Bluepad

न्याय 

सौ.मेघा नांदखेडकर

13th Jul, 2023

लिहून ठेवलंय म्हणे माझ्याच 
ललाटावर तू माझ भविष्य
वाचायला तर जमलंच नाही 
जरी संपलं अख्ख आयुष्य
             पाठवलस तू हातावर मारून 
             वाकड्या तिकड्या हस्तरेषा
             शोधून थकले त्यात तुलाच 
             मला न कळली त्यांची भाषा
भोगायला लावतोस म्हणे
भोग कर्मफळाच्या आधारे 
नशिबात असेल तेच घडते
मग कशाला भक्तीची बाधा रे 
              जे हवे मनापासून त्यासाठी
              सदैव माणसाला तरसवतोस
              जे नको असेल ते मात्र तू का
              अतिवृष्टीप्रमाणे बरसवतोस 
दुष्कर्म करून मुक्त फिरतात 
किती झाल्या जरी पापराशी 
असा कसा तुझा न्याय ईश्वरा
चोर सोडून संन्याशाला फाशी
              मानवजन्म देतोस म्हणे तू 
              करण्यासाठी जीवन सार्थ
              जगण्याचा ना कळला अर्थ
              अर्धे आयुष्य जरी गेले व्यर्थ

Written by

सौ.मेघा नांदखेडकर

Comments

SignIn to post a comment

Recommended blogs for you